其他 | 2022年6月17日 資深攝影師教路：三個影靚靚product shot大法

產品攝影睇落好易，但當中嘅竅妙一啲都唔易於掌握，所以我哋請教咗 「手作產品攝影技巧入門班」嘅導師 Andy（圖左），從事攝影好多年，佢話影到張吸引到客人，又影到理想中效果嘅產品攝影，其實真係要有啲經驗㗎！

第一，手作產品種類有好多，作為手作人係最了解產品材料同造工。而材質唔同，拍攝手法都會有所改變。所以，想影到靚仔嘅相，影相時要探索最啱你產品嘅Tone & Manner。例如全白定花花背景？有Mood嘅大光圈，定影到每個細節嘅細光圈？全部都唔可以亂影㗎～

第二，要影到理想嘅效果，參考圖片係不可或缺！可能你想要嘅效果，同攝影師心目中嘅效果都唔一樣，但只要搵到一張「啱Feel」嘅參考圖片，就可以成為你好好嘅參考。Andy提到，如果你決定搵攝影師幫手影，有參考圖片就可以幫你手同攝影師溝通，唔會影出嚟貨不對版。

第三，燈光係直接影響相片效果嘅重要因素。攝影本來就係一個光學嘅應用，燈光當然係重點。而產品攝影嚟講，燈光亦係帶出產品細節嘅重要元素。只要燈打得好，就可以令到細節位同設計嘅心思，都可以畀人睇得一清二楚。